Urdu Khabrain
Urdu Khabrain is the world most populated Urdu News website. You can find and read daily Urdu news.

’پریانکا کو پاکستان بھیج دو‘ انتہا پسند ہندوؤں کی پکار

0 20

ممبئی: بالی ووڈ کی اسٹائلش اداکارہ پریانکا چوپڑا کے خلاف امریکی ٹی وی سیریز ’کوانٹیکو‘ کی تازہ قسط کی کہانی کے سلسلے میں انتہا پسند ہندوؤں نے شدید احتجاج شروع کردیا ہے۔

تفصیلات کے مطابق بین الاقوامی سطح پر مشہور بھارتی اداکارہ پریانکا چوپڑا امریکی ٹی وی شو ’کوانٹیکو سیزن 3‘ میں بھارتیوں کو دہشت گرد دکھائے جانے پر سخت مشکلات میں گھر گئی ہیں، مداحوں کا کہنا ہے کہ پریانکا کو پاکستان بھیج دیا جائے۔

امریکی ٹی وی شو، جس میں سابقہ ملکہ حسن مرکزی کردار نبھا رہی ہیں، کی تازہ قسط میں بھارتی قوم پرستوں کو دہشت گردی کے ایک ایسے واقعے کی منصوبہ بندی کرتے دکھایا گیا ہے جس کا الزام بعد میں پاکستان پر تھوپا جانا تھا۔

کوانٹیکو کی تازہ قسط کے خلاف سخت آن لائن احتجاج کے بعد امریکی ٹی وی اسٹوڈیو اے بی سی کو باضابطہ طور پر بھارتیوں سے معافی بھی مانگنی پڑی۔

دو روز قبل اے بی سی کی طرف سے آفیشل معافی کے بعد انتہا پسند تنظیم ’ہندو سینا‘ نے اداکارہ پریانکا چوپڑا کے خلاف منظم احتجاج کا سلسلہ شروع کردیا ہے، انتہا پسند گروپ کا کہنا ہے کہ پریانکا نے ہندوؤں کو دہشت گرد دکھا کر تذلیل کی ہے۔

پریانکا کے خلاف احتجاج کے دوران ان کی تصاویر بھی جلائی گئیں، مظاہرین نے پلے کارڈز اٹھارکھے تھے جن پر لکھا تھا پریانکا غدار ہے، اسے پاکستان بھیج دیا جائے۔ خیال رہے کہ بھارتی اسٹار اداکارہ کو اپنے ہم وطنوں سے معافی بھی مانگنی پڑی۔

I’m extremely saddened and sorry that some sentiments have been hurt by a recent episode of Quantico. That was not and would never be my intention. I sincerely apologise. I’m a proud Indian and that will never change.

— PRIYANKA (@priyankachopra) June 9, 2018

پریانکا چوپڑا نے گزشتہ روز اپنے ٹوئٹر اکاؤنٹ پر لکھا کہ مجھے سخت دکھ ہوا اور میں معذرت خواہ ہوں کہ کوانٹیکو کی تازہ قسط کے باعث لوگوں کے جذبات مجروح ہوئے۔ میں نے یہ جان بوجھ کرنہیں کیا، نہ ہی ایسا کبھی کروں گی، مجھے بھارتی ہونے پر فخر ہے اور ہمیشہ رہے گا۔

کوانٹیکو کی تازہ قسط چلنے پر پریانکا کو اپنے مداحوں کی جانب سے سخت حملوں کا سامنا ہے، چند مداحوں نے ان کے کام کا بائی کاٹ کرنے کی دھمکی بھی دے دی ہے اور کہا ہے کہ وہ جن برانڈز کی تشہیر کرتی ہیں ان کا بھی بائی کاٹ کیا جائے۔


مداحوں نے حکومت سے بھی مطالبہ کیا ہے کہ ٹی وی شو کے اُن مناظر کو بلیک آؤٹ کیا جائے جن میں نیو یارک میں جوہری بم پھاڑنے کی منصوبہ بندی کرنے والے کو بھارتی قوم پرست دکھایا گیا ہے۔

انتہا پسند تنظیم ’ہندو سینا‘ نے ایک پریس ریلیز جاری کرتے ہوئے کہا ہے کہ ایک ایسی عورت جو ایک بھارتی آرمی آفیسر کی بیٹی ہے اور مس ورلڈ رہی ہے، اور اقوام متحدہ کی سفیر بھی ہے، نے اپنے ملک کو محض چند پیسوں کے لیے بدنام کرنے کی کوشش کی ہے۔

Loading...
loading...

Get real time updates directly on you device, subscribe now.

Loading...